Einar og Rakel í Aarhus

Alveg ad fara ad byrja aftur..

Tue, 02 Sep 2008 08:39:53 GMT

.... ad skrifa eitthvad fyrir ykkur fjolskyldu og vini. Erum bara ad reyna ad finna einhverja adra sidu, nennum ekki ad vera med tetta blogcentral rusl....

Go' påske !

Thu, 20 Mar 2008 09:09:33 GMT

Sama geðveikin í vinnunni. Unnum þrjá daga í þessari viku enda komnir páskar nu. Þessir þrír dagar gerðu samtals 37 tíma! Samt var mánudagurinn bara venjulegur... En heill hellingur búinn að gerast undanfarnar vikur. Þetta er það helsta:

1. Er kominn í fulla vinnu hjá Eimskip og tek pásu amk þessa önn í skólanum.
2. Fór á tónleika með Smashing Pumpkins - þvílík vonbrigði!
3. Er búinn að kaupa mér miða ásamt 7 öðrum eyjamönnum á REM 6. sept. á Parken
4. Er að fá mjög myndarlega launahækkun í vinnunni.
5. Styttist í 25 ára afmæli okkar Rakel og familían er að pæla í að koma út og fagna með okkur. Ætlunin er að leigja sumarhús hér rétt við Aarhus.
6. Eitthvað fleira sem ég man ekki í augnablikinu.

Núna er ég að þjóta út því við erum á leiðinni í páskafrí til Þýskalands með Stymma og Thelmu. Erum búin að fá bílaleigubíl og erum að fara að leggja í hann til Kellenhusen á norðausturströnd Þýskalands og verðum þar í sumarhúsi fram á mánudag. Biðjum kærlega að heilsa heim og óskum öllum gleðilegra páska!

Helt vildt !!!

Tue, 12 Feb 2008 21:41:03 GMT

Allt vitlaust að gera og enginn tími fyrir skriftir. Við vinnum eins og bastarðar niðrí Eimskip og eru mið, fim og fös að gera að meðaltali 33-34 tíma, lengstu dagarnir hafa verið þetta 7 til 21-22 eða 23. Síðan hafa helgarnar að mestu farið í djamm og vitleysu þannig að ekki er mikill tími aflögu fyrir skólann. Enda dregist vel aftur úr og ég veit svei mér ekki hvernig þetta endar, en einhvern veginn endar þetta þó, það er á hreinu. Vorum á Þorrablóti á síðasta laugardag og það var mjög gaman, þangað til skammhlaup varð í þeim hluta líkamans sem kallast haus og ég man ekki einu sinni hvernig ég komst heim.

Annars er stórhljómsveitin R.E.M. að sækja Danmörku heim laugardaginn 8. september 2008. Ég og Kela förum svo gjörsamlega bókað á þá tónleika (ef við náum miðum) að það er ekki fyndið. Fyrir þá sem vilja koma í heimsókn til okkar og fara í leiðinni á REM eða bara fara á REM hafið í huga að miðasala hefst á mánudaginn kl 10:00 að staðartíma (09:00 að íslenskum) á billetlugen.dk. Ef einhverjir vita ekki hvernig á að kaupa miðann þá býð ég fram aðstoð mína í því hér með. En sem sagt, þeir verða á Parken laugardaginn 8. sept og verða þetta væntanlega tónleikar ársins, ef þið hafið ekki séð REM á tónleikum þá mæli ég með disknum Perfect Square sem er hreinlega geðveikur.

Svo eru Hörður Orri og Erna Dögg að koma í heimsókn til okkar á fimmtudaginn og verða yfir helgina. Já, kæru landar þið heyrðuð rétt: annar vinur minn kemur í heimsókn til mín DK á þeim rúmlega tveimur árum síðan ég flutti fyrst út! Þetta eru ótrúlegar fréttir. En okkur hlakkar alveg gríðarlega til hér á Viborgvej að taka á móti þeim, þetta verður án efa skemmtilegur tími. Annars er það bara vinna sex í fyrramálið eða i morgen tidligt eins og sagt er á máli innfæddra, að taka á móti einhverjum hundruðum tonna af ógeðisfisk frá Færeyjum. Yfir og út.

Eimskipsmaður

Sun, 13 Jan 2008 20:52:45 GMT

Jæja, þá er maður kominn úr veðurofsanum á klakanum og yfir í blíðuna hérna í DK. Lentum í Aarhus um hálf eitt á þriðjudagsnóttina síðustu. Það er í raun ótrúlegt hvað er búið að vera gott veður undanfarna daga en lok desember og janúar eru kaldasti tíminn hér en samt hefur verið 5-7 gráðu hiti síðustu daga og nánast logn, reyndar rigning inná milli. Ég er loksins kominn aftur með vinnu en fyrir síðustu önn ákvað ég að ég skyldi ekki fara í eitthvað starf þar sem ég væri að kleprast úr leiðindum og ógeði með skítalaun, ég hef fengið minn skerf af því á síðustu árum og ákvað að slíkt myndi ég aldrei gera aftur. Einnig reyndist erfitt að finna eitthvað hlutastarf enda ekki mikið af slíku í boði. En ég sótti því einungis um störf sem ég vissi að ég hefði áhuga á að vinna og það endaði í samtals tólf umsóknum, aðallega störf á veitingastöðum og hótelum, reyndar eitt málarastarf líka. Var reyndar boðaður í eitt starfsviðtal, sem sendill í bakaríi og hélt ég sannast sagna að ég væri öruggur með það starf enda talaði gaurinn þannig. En ég fékk það ekki. Í heildina þá voru allar þessar umsóknir kannski fullmikil bjartsýni enda var krafist reynslu eða menntunar í öllum þessum störfum, sem ég uppfyllti ekki í neinu tilfellanna, og því kannski ekki skrýtið að ekki hafi orðið kápan úr því klæðinu. Nóg var að gera samt í skólanum og hef ég fengið einkunnirnar og náði ég öllu, sem þýðir námslán! Jammí.

En ég er sem sagt kominn með vinnu hjá Eimskip hér í Aarhus en það losnuðu einhver tvö störf í vöruskráningunni í pökkuninni til Íslands og Færeyja, þannig að maður þarf ekki lyftarapróf þar (sem ég hef ekki). Nummer neun hann Sturma, sem er nýbyrjaður hjá Eimskip líka eftir að þeir yfirtóku vöruhús Maersk, var búinn að athuga fyrir mig en ég gat ekki fengið vinnu þar nema vera með lyftarapróf og vera í fullri vinnu líklega. En svo kom þetta upp, þessar stöður í vöruskráningunni. Sturma sagði yfirmanninum sínum frá mér og honum leist svona helvíti vel á kallinn að ég átti bara að mæta strax morguninn eftir að ég kom hingað út og hef sem sagt hafið störf, meira að segja er búið að fastráða mig sem þýðir hærri laun og alles. Hef reyndar ekki skrifað undir samninginn ennþá en yfirmaðurinn er búinn að tala við mig og lofaði því að ég fengi góð laun og ég veit að það mun standast enda alger toppnáungi hann Preben eða Rebbi eins og ég og Sturma köllum hann. Reyndar er kerfið þarna niðurfrá ekki enn komið almennilega í gang þar sem þetta er bara allt að skríða af stað hjá Eimskip þarna niðurfrá. En dagvinnutíminn er sem sagt 7-15 og ég verð að vinna þrjá daga í viku, miðvikudag, fimmtudag og föstudag en það eru dagarnir þar sem mest er að gera svo í ofanálag má reikna með nokkurri yfirvinnu á þessum dögum. Enda hafa fyrstu þrír dagarnir verið hrein geðveiki. Það var reyndar “bara” unnið til 16 á miðvikudaginn en á fimmtudaginn unnum við frá 7-21 og það án pásu frá 12:30 til 21:00, steikt. Svo á föstudaginn þá unnum við frá 7-23 og þá var ein 10 mín pása frá 12:30 til 23! Já, enn meira steikt. En þar sem þetta er allt að startast þá tekur allt lengri tíma en ætti að gera, auk þess sem magnið af vöru sem er að fara til Íslands og Færeyja í gegnum Eimskip hér er ekkert alveg í lagi. T.d. voru Maersk að pakka fyrir Eimskip svona 3-400 gámum á viku til Færeyja en núna verða þeir um 2500 á viku! Fyrir utan Íslandsvöruna. Bara rugl. Svo á föstudaginn þá spurði Preben mig hvort ég hefði áhuga á að taka lyftarapróf og ég játti því að sjálfsögðu enda mun Eimskip borga mér full laun meðan ég tek prófið sem tekur held ég um viku, auk þess sem þeir borga prófið. Það væri bara snilld að fá slíkt próf, hvort sem ég myndi svo frekar vilja halda mig í vöruskráningunni eða vera á lyftaranum.

Annars er bara verið að koma sér fyrir aftur, taka upp úr ferðatöskum enn eina ferðina. Svo styttist í Smashing Pumpkins en þeir verða í febrúar. Hef ákveðið að selja miðana á The Cure sem eru líka í feb enda eru tónleikarnir á miðvikudegi og vinnan gengur víst fyrir, þarf að biðja um frí þegar Smashing tónleikarnir verða og nenni ekki að gera það tvisvar svona nýbyrjaður. Svo er það bara áframhaldandi skóli en ég á þrjár annir eftir. Tek líklega aftur þrjá áfanga núna líkt og síðustu tvær annir og munu það verða tveir fjölmiðlafræðiáfangar og einn stjórnmálafræði. Einhvern veginn held ég að skólinn fari í fokk með svo mikilli vinnu, því ég efast stórlega um að maður nenni að læra eitthvað um helgar og þá eru eiginlega bara tveir dagar á viku sem maður getur lært. En við sjáum til.

Svo er ég sjúklega að pæla í að skella mér til Berlín í júlí á Radiohead en það kostar skitinn 10 þús kall að fljúga fram og til baka frá Köben til Berlín, hver vill með? Búinn að fá discboxið með In Rainbows og ái hvað það er cool. 2 cd, vinylplata, artbók og svo bók með textum. Gargandi snilld, hvet alla til að hlusta vel og vandlega á nýja diskinn, hann verður einfaldlega betri og betri með hverri hlustun.

En þangað til næst, yfir og út.

Juleferie!!!!

Wed, 19 Dec 2007 23:08:39 GMT

Já :lol: ég er komin í jólafrí!!!!

Og vá léttir dauðans!!! úff hvað síðusru vikur hafa verið strembnar.... en það var þess virði þar sem mér gekk líka svona ótrúlega vel í munnlega prófinu :haha: fór allavenna fram úr mínum eigin væntingum.... sem er alls ekki slæmt

Eeeen nú er það bara jól á paradísareyjunni næst á dagskrá, en ég kemst loksins heim 22. des. hefði nú viljað koma fyr en svona er þetta bara, þýðir ekki alltaf að velta sér uppúr eikkerjum smáatriðum.. og svo hef ég nóg annað að lava hénna í DK....

en við stelpurnar ákváðum að við áttum sko skilið að slappa af og borða góðan mat og bara hafa það ógeðslega gott, þanig að ég bauð þeim í mat og súkkulaðibombu í eftirrétt JAMMÍ!!!! og svo sátum við bara og spjölluðum og spjölluðum og svo spjölluðum við aðeins meira, bara notó

en svo er það bara að ná að klára að kaupa síðustu jólagjafirnar og pakka niður og svo er það bara jól 2007 :haha: og vá hvað ég ætla að njóta þess að vera heima, hver veit hvenær ég kem næst :$ þjóðhátíð væntanlega eeen það er víst allt of langt í það til að vera að velta því fyrir sér...

Það verður væntanlega ekki mikið skrifað hér inn næsta mánuðinn þannig að ég vil bara óska öllum

og vona bara að þið eigið æðisleg jól og hafið það bara ótrúlega gott!!! :haha:

Kossar og jólaknús!!!

Rakel!!! sem er búin með prófin og komin í jólafrí sjibbÍÍ!!!! :lol:

Loksins, loksins

Sun, 09 Dec 2007 17:29:00 GMT

Jæja! held það sé alveg kominn tími á einsog eitt stk. blogg 8|

En það er nú bara þannig að það hefur gjörsamlega verið hreint brjálað að gera nú síðasta mánuðinn eða svo. Reyndar er þessi önn bara búin að vera CRASY, eeeen þetta er allt að taka enda núna :haha:

En ég fer s.s. í munnlega prófið núna 19.des og þá er þessu bóklega ári lokið og við tekur mun skemmtilegra ár, þar sem ég á eftir að vera í mun fleiri kretivum áföngum í stað bóklegra.

Þetta ár hefur verið ótrúlega lærdómsríkt þó svo ég hélt að þetta bóklega bull gæti nú ekki átt eftir að hjálpa mér mikið í framtíðinni. Þannig er nefninlega að Teko er eini skólinn sem kennir bóklegt í bland við kreativt, þetta bóklega er allt frá hvernig bransinn virkar til stjórnunar á fyrirtækjum til markaðsfræði og reyndar fullt fullt fleira, en þetta er kannski það allra helsta. Eftir að vera nánast búin með þetta ár þá skil ég vel af hverju það er nauðsynlegt að taka þetta bóklega með, þó það sé ekki það skemmtilegasta. Það gerir manni kleift að skilja bransann, hvernig hann virkar og einfaldlega bara svo maður hafi einhverja glóru um hvernig maður á að snúa sér að námi loknu.

Ég fer s.s. í munnlega prófið 19.des, þannig að tíminn fram að því fer bara í að undirbúa það, svo vegna þess að beljan sem sá um að raða upp hvenær hóparnir áttu að fara í prófið, laug að mér 2X þá kem ég ekki heim fyr en 22. des :klikk:

En ég held að ég eigi alveg eftir að geta notað þann tíma hérna í DK í e-ð sneddí, einsog að sauma áramótakjól, detta íða(prófloka djamm :haha:), sauma buxur á múttu og sauma kannski eikkað sætt fyrir Helgu frænku til að hafa utan yfir sig á brúðkaupsdaginn :haha:

Jæja þýðir ekki víst ekki annað en að drulla sér að halda áfram að læra, læri læri læri :haha:

þannig að ég held ég hafi þetta ekki lengra að þessu sinni, en set hénna smá link sem er alger skníld, þar sem ég og Einar tökum álfadansinn :haha:

http://www.elfyourself.com/?id=1244826549

Jólakveðja!!!

Rakel

Meiri ammli

Mon, 03 Dec 2007 23:37:45 GMT

Já haldiði ekki að litla snúllan hún Jóhanna Rós frænka mín með meiru sé orðin 8 ára gömul! HA! Vá! Jóhanna mín, hvurslags eiginlega hraði er þetta á þér? Það má ekki líta af þér í smá stund og þá ertu allt í einu orðin 8 ára ! Þú verður orðin jafngömul og ég næsta sumar með þessum hraða! Jæja.. til hamingju með afmælið stelpa, við hlökkum til að hitta þig um jólin. Kannski ég taki þig í eins og eina kleinu, aldrei að vita. Hér er Jóhanna í afmælinu sínu þann 29. nóv s.l. með hinni síungu og yndisfögru Guðbjörgu Erlu Haraldsdóttir ömmu, hinum eina sanna forystusauði Toggaættarinnar.

Hún á afmælíí dag!!!

Tue, 27 Nov 2007 13:22:35 GMT

Hún Erla Signý á afmæli í dag og er hún 21 árs Gellan!

Til hamingju með afmælið sæta!!!

Hvor blev velfærden af?

Sat, 24 Nov 2007 15:27:51 GMT

Þann 8. nóvember s.l. var ég hjá lækni útaf löppunum og bað hann að senda mig áfram til einhverra sérfræðinga. Rúmlega viku síðar fæ ég bréf frá Aarhus Sygehus: Því miður getum við fyrst boðið þér tíma þann 19. febrúar 2008!! 16 vikna biðtími! Ég bara spyr: hvar er velferðin í þessu landi þar sem maður borgar lægst um 50% skatt? Þetta er það sem pirrar mig rosalega við Danmörku. Þeir eru rosalega stoltir af velferðaþjóðfélaginu sínu og stór hluti hefur þangað til núna ekki viljað lækka skattana útaf hræðslunni við að velferðin minnki. Allt í lagi, það eru algerlega fríir skólar, nemendur fá um 35-40 þúsund (eftir skatt) á mánuði í skólastyrk og hagur barnafólks er mikill þar sem öll þjónusta þeim tengd er nær ókeypis eða mjög ódýr og svo eru miklir afslættir sem barnafólk fær, t.d. í formi húsaleigubóta osfrv.

En burtséð frá því þá er ljóst að heilbrigðiskerfið á í einhverjum stórkostlegum vandræðum hérna. Nánast í hverjum mánuði kemur í fréttunum að þessi eða hinn hafi dáið á sjúkrahúsum hérna vegna hrikalegra mistaka. Annaðhvort er fólki gefið vitlaust lyf eða alltof stóra skammta. Í sumum tilvikum hefur verið gert aðgerð á vitlausum líkamspörtum! Gott og vel, allstaðar eiga sér stað mistök, líka á Íslandi. Fyrir nokkrum mánuðum síðan birtist mikil umfjöllun í blöðum hér um biðtíma í hinar ýmsu stórar aðgerðir og hve líklegt væri að fólk með ákveðna sjúkdóma eða veikindi myndu fá bót meina sinna og voru hin ýmsu lönd borin saman við Danmörku. Ég sé rosalega eftir að hafa ekki klippt þetta út og átt því þessi umfjöllun var sláandi. Ég man ekki í smáatriðum tölur og tölfræði en umfjöllunin snérist um að fátækari lönd Evrópu stóðu Danmörku framar á mörgum sviðum heilbrigðiskerfisins. Ef þú býrð t.d. í Slóveníu og öðrum austantjaldslöndum þá voru meiri líkur á að þú fengir bót meina þinna varðandi hjartavandamál og eitthvað meira heldur en Danmörku. Landi þar sem skattalægstu borga 50% skatt og þeir skattahæstu um 63% skatt ! Hvað er eiginlega að! Ég þarf að fara í skoðun vegna íþróttameiðsla og hvað.. 16 vikna biðtími! Þetta er auðvitað ekki í lagi. Ég hefði reyndar getað valið um að breyta um sjúkrahús og farið t.d. til Randers þar sem var stysti biðtíminn innan Aarhus Amt, eða 2 vikur, en einhvern veginn held ég að sérfræðingarnir hér og öll aðstaða sé betri og því ákvað ég að bíða frekar. En mikið rosalega hlakka ég til þegar þriðjudagurinn 19. nóvember rennur upp og (vonandi) mitt ferli til bata hefst. Hver veit nema maður geti kannski spilað fótbolta aftur og það kannski á háu leveli. Og þá fæ ég kannski tækifæri til að sýna hvað virkilega býr í mér, sem ég gat eiginlega aldrei með ÍBV því miður. En best að vera ekki of bjartsýnn. Fyrst og fremst ætla ég að einbeita mér að því að ná mér góðum á þann hátt að það hætti að hafa áhrif á mitt daglega líf - allt annað verður bónus.

Febrúar verður greinilega tónleikamánuðurinn mikli í Köben. Við erum að fara á hina mögnuðu 80´s sveit The Cure þann 14. febrúar en það var nú meira svona uppá flippið að kaupa miða á þá. Langt frá því að vera einhver uppáhaldshljómsveit hjá mér en um leið og ég sá að þeir voru að spila þá bara hugsaði ég með mér að ég yrði að fara. Sunnudagurinn 24. febrúar eru Queens of the Stone Age og mig langar drullumikið á þá en veit ekki hvað ég geri. En svo var að detta inn the big bang má segja: SMASHING PUMPKINS miðvikudaginn 27. febrúar!!! Og ég er svo að fara á þá að það er ekki fyndið! Enda eitt af allra bestu böndum sögunnar að mínu mati. Ég og Rakel förum líklega og einn félagi minn hér, hann Elli, Stokkseyringurinn skrýtni úr Eskihlíðinni ætlar og kannski kærastan hans. Það veltur þó á því hvort við fáum miða en miðasala hefst á mánudagsmorgun kl 10. Hólí shitt hvað ég hlakka til maður! Þessir tónleikar verða einhver truflunin!

Apple rúlar

Thu, 22 Nov 2007 20:13:06 GMT

50%

Cleveland Dating

Fogh fortsætter...

Wed, 14 Nov 2007 17:11:42 GMT

Anders Fogh Rasmussen, Pia Kjærsgaard og Naser Khader

Þá eru þessar þingkosningar sem Anders Fogh boðaði óvænt til fyrir nokkru síðan að baki. Meirihlutinn og um leið hægri stjórnin hélt hér í Danmörku eftir kosningarnar í gær en mjög tæpt þó. Færeyingar eiga eitt fast þingsæti á Folketinget sem ekki er kosið um, og var því nánast slegið föstu að sá færeyski yrði með hægri blokk Foghs. Með “færeyska þingmanninum“ héldi stjórnin því velli og fengi 90 þingmenn. Vinstri flokkarnir eru saman með 85 þingmenn og svo er nýji flokkur Nasers Khaders, Ny Alliance með 4 þingmenn. Fyrir kosningarnar þá kom hann sér fyrir í hægri blokk Anders Fogh og sagðist styðja hann sem forsætisráðherraefni sitt. Á tímabili leit út fyrir að Ny Alliance hefði getað orðið stór og mikilvægur póstur í niðurstöðum kosninganna, á tímabili mældist flokkurinn með 22 þingmenn, sem hefði verið hrein geðveiki. Flokkurinn hrapaði mikið á lokasprettinum, fékk aðeins fjóra menn og því þarf/þurfti Fogh ekki endilega að taka Ny Alliance inn í meirihlutann frekar en hann vildi.

Núna í dag lýsti svo Færeyingurinn, Edmund Joensen, því yfir að hann vildi ekki skipta sér af innanlandsmálum Dana á þeirra þingi og þar með er meirihluti Foghs í raun dottinn niður í 89 þingsæti gegn 85 þingsætum stjórnarandstöðunnar. Staðan er þá orðin nokkuð breytt þar sem nú eru Ny Alliance komnir í mun betri stöðu; fimm manna meirihluti er nú tæpur í svona stórum þingmannahópi en fjórir eru enn minna. Fogh getur í raun ekkert annað gert en að taka NY með í meirihlutasamstarf enda myndi hitt skapa hættu á að þeir færu heilhring og ætluðu sér að fara með vinstri flokkunum, sem þá ja.... myndi líklega leiða til stjórnarkreppu. En slíkt er nánast óhugsandi. Fogh er amk farinn að ræða við Khader og verður nýr meirihluti ríkisstjórn Venstre, Dansk Folkeparti, Konservative og Ny Alliance líklega myndaður á næstu dögum.

Margt í dönskum stjórnmálum finnst mér skrýtið en jafnframt áhugavert. T.a.m. er það hefðin fyrir minnihlutastjórnum hér, sem þekkist ekki víða. Ríkisstjórnin sem nú situr, Venstre og Konservative, eru t.d. í minnihluta en hafa fengið stuðning hjá Dansk Folkeparti á kjörtímabilinu. Sá flokkur græðir einn mann frá síðustu kosningum á meðan Venstre tapar 6 og Konservative standa í stað þannig að það verður að teljast líklegt að Dansk Folkeparti krefjist stöðuhækkunar í samstarfinu; setu í nýrri ríkisstjórn og góðan slatta af ráðherrasætum. Enda gaf Pia Kærsgaard formaður flokksins það í skyn í hringborðsumræðum eftir að úrslitin voru orðin ljós í gær. Eins gæti vel farið svo að Khader krefðist ráðherrastóls og þá er Fogh í raun ekki í góðri samningsstöðu.

En talandi um skrýtið, stærsti hægri/frjálshyggju flokkur landsins heitir Vinstri.. skemmtilegt...

Arcade Fire in da house !!!

Sat, 10 Nov 2007 12:00:51 GMT

Óhætt er að segja að tónleikar Arcade Fire á miðvikudagskvöldið síðasta hafi verið 6 klst lestarferða virði, og gott gott gott betur en það. Tónleikarnir voru í einu orði sagt hrein snilld enda ekki annað hægt þegar jafn geðveikt band með jafn geðveika músík er samankomin til að spila í crazy hljóðkerfi 25 metra frá manni. Og maður í bestu stúkusætum hússins. Ég var búinn að heyra að þeir væru góðir á sviði en vá! Þetta er tvímælalaust besta “live performance” sem ég hef orðið vitni að og kemst mjög ofarlega á listann yfir mína bestu tónleika, jafnvel alveg uppí þriðja sætið. Það er amk erfitt að hnika við Radiohead og Muse. Þau voru 10 talsins á sviðinu (eru samt bara 7 í hljómsveitinni) og var þetta eins og að horfa á sinfóníuhljómsveit spila indí rokk af bestu gerð. Ég ætla að reyna að telja upp öll hljóðfærin, þó ég eigi pottþétt eftir að gleyma einhverjum. Nokkrar tegundir rafmagnsgítara létu sjá sig, banjó, bassi, trompet, básúna, 2 fiðlur, venjulegt trommusett, annað mjög óvenjulegt svona hálfgert rafmagnstrommusett, banjó, kassagítar, píanó, orgel, harmonikka, eitthvað svona snúningsdót, svona ásláttarhljóðfæri svona kling kling úr járni, og svo svona sem maður hristir og ég get ekki munað hvað heitir. Líklega er ég að gleyma einhverju. Og öll hljóðfærin voru í gangi allan tímann! Og ekki nóg með þetta, heldur skiptust 7 manns af 10 á nær öllum hljóðfærunum á sviðinu! Aðalsöngvarar bandsins og stofnendur, Win og Régine fóru þar fremst í flokki. Þau sungu, spiluðu á rafmagnsgítar, banjó, kassagítar, harmonikku, trommur, slagverk, píanó og orgelið. Og sama gilti um hina. Þetta var alveg ótrúlegt. Eina sem ég get kvartað yfir var hljóðið í tveimur lögum, Haiti og Rebellion (Lies). Í Haíti var hljóðmaðurinn greinilega eitthvað annað að hugsa og eins í Rebellion þá var píanóleikurinn sem er stór partur af laginu í algjöru volli, og hreinlega skar í eyrun. En annars var hljóðið ótrúlega gott miðað við þessa litlu íþróttahöll sem tekur aðeins 3500 manns. Flottasta lagið var að mínu neighbourhood #3 (Power Out) þar sem allir 3500 áhorfendurnir stóðu og klöppuðu allan tímann við þennan geðveika takt sem er í laginu og í öðru sæti myndi ég segja Wake Up. Annars er erfitt að velja úr.

Ég mæli allavega með því að þeir sem ekki hafa kynnt sér þetta band skuli gera það strax! Neon Bible plötuna greip ég strax í byrjun en Funeral var ég aðeins lengur að meðtaka. Þær eru báðar svo hrikalega góðar að ég get ekki gert uppá milli lengur, fannst Neon mun betri fyrst. Og eins er fyrsta stykkið þeirra EP platan þrusugóð. Allar þessar þrjár plötur fara mjög ofarlega á listann minn yfir bestu plötur í sögunni, det er helt klart ! Fyrir ykkur Arcade Fire fólkið þarna úti þá var lagalistinn nánast alveg eins ef ekki bara akkúrat sá sami og þau tóku í Noregi fyrir um viku síðan með reyndar 2-3 lögum til viðbótar: Black Mirror, Keep The Car Running, Neighbourhood #2 (Laika), No Cars Go, Haiti, In the Backseat, My Body Is a Cage, Ocean Of Noise, Surf City Eastern Bloc, Old Flame, Neighbourhood #1 (Tunnels), The Well And The Lighthouse, Crown of Love, (Antichrist Television Blues), Neighbourhood #3 (Power Out), Rebellion (Lies). Encore: Intervention, Wake Up

Í gær var farið á innanhússæfingu með Heklunni og eftir það í buzz, bjór, pílu, bjór, póker og bjór heima hjá Stymma en Gunnar Heiðar og Bjarný eru hér í heimsókn og svo komu Hlynur Ágústs og Ingibjörg líka á fimmtudaginn. Þannig að það var sannkölluð eyjastemning og helvíti gaman. Pókerinn náði til næstum því fjögur í nótt og fór svo að ég tók pottinn sem var 5000 ísl kr (400 dk) og það var ekki leiðinlegt og ég fékk í leiðinni Bubba tónleika live í gegnum símann en hössi og kassi voru duglegir að hringja og leyfa mér að hlusta... hefði verið gaman að vera á leikum með kóngnum.... En svo verður eitthvað flippað í kvöld og verður án efa farið í buzz aftur enda tapaði ég í því í gær og það er ég ekki sáttur með....

mvh, Einar

Allt að gerast....

Tue, 06 Nov 2007 12:10:06 GMT

Hejsa.

Hlutirnir ganga fínt fyrir sig hér á austur Jótlandi. Haustið búið að vera mjög gott eftir slæmt sumar (sem ég missti af því ég var í góða sumrinu á Íslandinu góða hehe). Hiti uppá 10-15 stig nær hvern dag og sáralítið rok. Nú er hinsvegar að byrja að kólna vel og er hitastigið komið í þetta 5-7 gráður sem þýðir að ef það blæs einhverstaðar á bert skinn þegar maður hjólar þá síast kuldinn vel inn. Passar akkúrat fyrir mútter og tengdó sem koma í heimsókn þann fimmtánda þessa mánaðar, koma beint í kuldann. Sem þó er Þjóðhátíð í Eyjum miðað við veðrið sem hefur verið á Íslandi í haust. Maður er hálfpartinn hræddur við að koma heim og fara í dallinn...

Er búinn að vera að gera upp við mig hvað ég ætti að mér að gera í haust með skólanum. Vinnulega séð er þetta svolítið bras þar sem ég þarf helst að vera í einhverri vinnu þar sem ég ræð mér sjálfur, eða þeas hvaða daga ég vinn osfrv. Og þar sem ég er bæklaður á fótum þá er ég að reyna að komast hjá því að fara í vinnu þar sem ég þarf að standa mikið og þá er því miður ekki um margt að velja. Ákvað svo um daginn bara að skella mér í dönskuskólann hér til að byrja með, einfaldlega til að hafa eitthvað annað að gera en bara lesa og lesa og skrifa og skrifa. Og eins til að tapa ekki dönskunni mikið niður, þar sem maður viðheldur og lærir ekki mikið á því að vera bara heima. Fékk svo loksins tíma í dag miðvikudag og fór ég því í sprogcenterið í morgun á fund hjá námsráðgjafa og svo beint í svona inntökupróf þar sem maður er metinn og til að sjá á hvaða stigi maður á að byrja. Það eru s.s. sex stig eða sex modul í skólanum og þegar þú ert búinn með þessi sex stig þá tekuru lokapróf, svokallað studieprøven og þegar það er að baki þá ertu búinn með skólann og átt að kallast reiprennandi í dönsku og getur þá t.d. komist inní alla danska skóla (sumir skólar hér krefjast studieprøven í inntöku), ekki það að það skipti mig í raun einhverju máli. En eftir munnlegt próf og fjögur verkefni þá var mér tjáð að ekki þyrfti meira til, ég myndi fara beint á síðasta stigið eða modul 6, takk fyrir og góðan daginn. Ég reikna með að komast í einhvern bekk í næstu viku og þá byrjar fjörið, úha!

Annars gengur skólinn heima bara ágætlega. Skráði mig aftur í fullt nám eins og í vor eða 15 einingar en ákvað strax að taka bara 12. Tek einungis eitt lokapróf, í Evrópusamvinnu, en hin tvo fögin sem eru fjölmiðlafræðifög byggjast á heimaprófum og ritgerðum yfir önnina. Er búinn með tvö heimapróf og eina ritgerð og nú eru þrjú próf eftir og ein ritgerð, reyndar fimm próf þar sem ég missti af fyrstu tveimur útaf benidorm ferðinni.

Einnig er gaman að segja frá því að ég spilaði tvo fótboltaleiki um daginn með Íslendingaliðinu hérna, Heklunni. Fyrstu fótboltaleikir mínir í 2 ár og 3 mánuði og það gekk bara þolanlega. Liðið var í baráttu um að komast uppum deild en því miður náðum við því ekki, eftir mikinn klaufaskap enduðum við einu stigi á eftir liðinu fyrir ofan okkur sem fór upp. Var bara ótrúlega góður í löppunum á smá tímabili en eftir síðari leikinn gat ég varla labbað í viku og ansi margar verkjapillur fuku ofaní magann í langan tíma á eftir. Það var svo sem gott því það varð til þess að mín langþráða journey í leit að lækningu við krónísku compartment syndrom hófst. Fór til læknisins míns um daginn og hann sendi beiðni á sjúkrahúsið hér og er ég að bíða eftir tíma þar. Þeir eru víst með sérstaka fótadeild og miðað við það sem ég hef lesið á netinu þá ættu þeir að vita eitthvað um þessi helvítis meiðsli eða sjúkdóm eða hvað maður á að kalla þessa viðurstyggð.

Gunnar Heiðar og Bjarný eru svo komin í heimsókn og verða í viku. Gunnsi er í fríi núna og auðvitað ákvað hann að nota það til að skella sér til Aarhus og hitta félagana. Við kíktum í badminton í gærkvöldi, ég, gunnsi og stymmi og er óhætt að segja að maður sé vel þjakaður af harðsperrum í dag! En þetta var helvíti gaman og mun badminton eflaust verða einn af föstum líkamsræktarpunktum í hverri viku hér eftir.

Svo á morgun verður gaman gaman. Ég og Rakel förum þá í aðra tónleikaför til Köben, nú á hina mögnuðu indie sveit Arcade Fire. Þetta verður eflaust geggjað og munu þið eflaust fá ferðasöguna beint í æð. Nóg af bulli í bili, ætla að halda áfram að skoða hvernig ákvarðanatökuferlið er í lagasetningum innan Evrópusambandsins (jei..)

Nice life!!

Mon, 05 Nov 2007 09:31:57 GMT

Að undanförnu er allt búið að vera ja bara einu orði BRJÁLAÐ að gera eeeen nú er ég loksins búin að skila designverkefninu mínu vúhú!!! Þannig að nú er bara búið að vera afslöppun dauðans, fór reyndar í vinnu í gær en annars bara nice life. Ég skilaði s.s. verkefninu á fimmtudaginn og á föstudaginn kom snestorm í bæinn þannig að við gerðum okkur glaðan dag, buðum Thelmu og Stymma í mat, drukkum góðan bjór :Sað þeirra mati en mjög gott hvítvín:haha: að mínu mati, ótrúlegt hvað maður er nú orðinn þroskaðu ha!! ikke? Jæja svo var haldið niðrí bæ til að fá sér bjór, sem tilheyrir víst þessu kvöldi og ákváðum við að fara að hitta eikkerja íslendinga á Römer. Vorum við þar í góðum fílíng þangað til Thelma gerðist svo fræg að hrinja á hausinn á miðju dansgólfinu :haha::haha::haha: sorry dúllan mín en þetta var bara svooooo fyndið og kannski svona einum bjór of mikið skatta mín hahahaha:haha: æ vá sé þetta bara fyrir mér aftur og aftur í slow motion hahahh. jæja allavenna við skemmtum okkur ógó vel og alltof langt síðan síðast, verðum að fara að bæta upp fyrir tapaðan tíma :lol:

Ok leitaði af mynd af einhverjum vera að fljúga á hausinn í hálftíma en fann ekkert, fann þessa bara í staðinn, fannst þetta pínu fyndið, svo hefur maður nottla séð þessa live!! :haha:

En ég veit eiginlega ekkert hvað ég á að mér að gera, kann ekkert að hafa svona rólegt 8| en ætli maður reyni ekki að gera eikkað í þessu hreyfingarleysi og kannski byrja bara að kíkja á skruddurnar fyrir próf dauðans 8|

jæja ætla mér ekki að hafa þetta lengra í þetta sinn, skrifa bara vonandi fljótlega aftur!

Og jaaá mál málanna, vildi bara óska honum Einsa mínum til hamingju með fyrstu bloggfærsluna í ANSI marga mánuði, keep up the good work!!

til næste gang,

Hej Hej!

Landsliðsþjálfarinn trúður ?

Mon, 29 Oct 2007 15:59:45 GMT

Ætli Óli Jóh muni horfa á Trúðinn á fimmtudagskvöld á RÚV?

Guð minn almáttugur hvað ég held að KSÍ sé að gera í buxurnar með vali á nýjum landsliðsþjálfara. Óli Jó hefur alltaf slegið mig sem mjög skrýtinn gaur og ég held einhvern veginn að hann sé ekkert rosalega góður þjálfari. Á stundum er varla hægt að skilja hann í viðtölum fyrir furðulegheitum, hvernig er það þá að vera sem leikmaður hans hjá liði í efstu deild, hvað þá landsliðinu núna. Óli hefur alltaf haft góða aðstoðarmenn með sér sem held ég að hafi skipt sköpum fyrir árangurinn síðustu ár hjá FH fyrir utan nú það að ég hefði getað verið þjálfari hjá FH og náð sama árangri og hann með þennan mannskap sem er búinn að vera í Hafnarfirðinum. En ég tek það fram að þetta er einungis mín tilfinning fyrir þessu, reyndar smá orðrómar kannski líka, ég get engan veginn dæmt hann sem þjálfara enda hefur hann aldrei þjálfað mig.

Ég hafði reyndar heldur ekki mikla trú á Eyjólfi í starf landsliðsþjálfara. Ég fíla hann reyndar vel sem karakter og þjálfara en ég kynntist honum nokkuð eftir að hann valdi mig í U-21 landsliðið fyrir hvað... 2-3 árum. Hann náði vel til okkar og við náðum fínum árangri. Ég var þó einhvern veginn viss um að honum myndi að sama skapi ekki ganga vel með A-landsliðið einfaldlega vegna þess að hann var alltof tengdur leikmönnunum auk þess sem það þekkjast alveg meiri hörkutól en hann Jolli. Sem kannski hafði mikil áhrif ef agavandamálin eru sannar fréttir. En ég vona auðvitað innilega að Óli nái góðum árangri með liðið og ég verð þá bara að éta hatt minn og staf ef svo fer.

En að öðru jákvæðara. Vísirinn birti í dag frétt um að íslensk stelpa í námi í Danmörku hafi komið einum bestu gamanþáttum ever (dönskum að sjálfsögðu) á dagskrá RÚV sem hluta af lokaverkefni sínu í viðskiptafræði. Þættirnir heita Klovn á dönsku og munu fá beina þýðingu og heita Trúður á okkar móðurmáli. Þetta eru geggjaðir þættir að mínu mati og ég grenja yfirleitt úr hlátri yfir hverjum þætti yfir óförum Frank Hvam, eins aðalleikarans. Ég er búinn að horfa á allar þrjár fyrstu seríurnar og nú var að koma sú fjórða sem ég bíð spenntur eftir að kíkja á. Fyrsti þátturinn er sýndur á fimmtudagskvöldið á RÚV og ég mæli eindregið með því að allir og þá meina ég allir, horfi á þáttinn. Ef ykkur finnst fyrsti þátturinn ekkert spes, ekki gefast upp, þeir verða bara betri og betri. Trúður and out...